اصحاب فوق العاده

النهارده عايز اتكلم عن اصحابى حاجه من اهم الحاجات اللى فى حياتى وخط من الخطوط الحمره اللى مش بسمح لحد يقرب منها

انا هتكلم من غير ترتيب عشان ما حدش بقول حاجه ها

خلونى ابدأ بعبد الله

اولا زميل كفاح من تالته ثانوى

عارفين المثل بتاع القط بيحب خناقه انا وعبد الله كده القط والخناق والعكس صحيح

انا وعبد الله لينا ساعات كتير ردود فعل مشابهه وكلام بيطلع مننا زى بعض فى نفس الموقف

عبد الله كمان تقدروا تقولوا اسرار اصحابنا معاه لدرجه انى ساعات بشفق عليه صاحب شخصيه قويه

ما بيزعلش من حد بس زعله جامد بس تعرف تصالحه بسرعه لما قفشاته ملهاش حلنسيبه حبه بقى عشان الباقى

اسلام محمود

تحسه جدع راجل معاك فى اى موقف برضه انا وهو بنتقاسم دماغ قريبه وبنلقط بسرعه من بعض دماغه نضيفه

شويه مش بيحب يشارك الناس فى الامور اللى هى فى الملفات السريه اوى

تحبه كده من اول ما تتصاحب عليه وقعدته حلوه دايما

نيجى بقى لاسلام ضياء

انا فى حياتى ما شفت حد بيقدس الصحوبيه بالشكل ده بجد بجد صاحب صاحبه اوى

اكتر واحد بيحب يحافظ على الصحوبيه ويحب دايما يسمعلنا طيب لابعد الحدود بقى عصبى حبتين اقل حاجه تضحكه

ميتو

ميتو ده بقى عارفين لما يبقى العيله فيها بتاع 6 شباب ومعاهم اخوهم الصغير اللى دايما له دماغ تانيه وعامل دوشه ساعات يعمل حاجات ممكن تهبلهم بس فى نفس الوقت ممكن يعمل حاجه تانيه تعجبك منه اوى ودايما تحس انك مسئول عنه لانه اخوك الصغير وتحبه جدا مهما عمل فيك ممكن تقفش بس برضه بتحبه

دمه خفيف وجدع وبيحب الناس وطيب اوى وحساس جدا

ابو الاسرار

دماااااااااااااااغ لابعد الحدود هادى عاقل راسى برضه مش بيحب يفتح ملفات سريه كتير كل حاجه عنده بتتعمل فى صمت

زميل كفاح من اولى ثانوى محايد دايما فى ارائه القفشه اللى بتطلع منه قفشه من القلب بتهلكنا من الضحك كلنا

عبد الحميد

حبيب قلبى العنيد العصبى اللى اقل كلمه ممكن تصالحه وتهديه والامور تبقى تمام

اقل كلمه ممكن تضحكه وتنسيه الدنيا تحس فيه كده ان شخصيته قويه وما يعجوش الحال المايل

محمد السيد

ده بقى ملك التصرفات المجنونه الطقه فاكهه القعده بتاعتنا فجأه تلاقيه طلع كده بحاجه تموتنا من الضحك

انسان عملى جدا جدا بيحب الشغل بأيده لينكساوى حتى النخاع زى حلاتى كده ما يتشبعش من القعده معاه

ما بيحبش يضيع وقت وجدع

ضياء

ده بقى له عالم خاص عايش فيه لوحده دماااااااااااغ والله بيحب الحركه الكتير بيحب الضحك والحياه عنده ماشيه وكله تمام

احمد سلطان

ترتاح لوشه اه والله لما تشوفه ترتاحله لما يضحك انت تضحك على ضحكه

ما بيعرفش بتعصب على حد ولا يزعل من حد طيب تصاحبه بسرعه اوى وترتاحله بسرعه برضه

محمود جمال

راجل صاحب فكر ودماغ بجد والله بس لما بيتعصب نصيحه اخويه بلاش تقف اودامه

احمد مسعود

معرفتى بيه مش طويله بس شخصيه تحبها والله وتفتقده كده تحب قعدته برضه خد منه احلى كلام لما يهيس على حاجه

صحاب سلسله ايام الامتحانات على البلوج بتاعته

الاسكندرانى

راجل رياضى كده وجدع ويتحب كده هادى وعاقل حتى لو طق بيبقى فى حدود المعقول ودمه خفيف

وليد

هادى خاااااالص وبرضه زى ما تقولوا قفشته من قلبه وليد تقريبا زى ابو الاسرار كده برضه بيحب يعمل حاجته فى صمت

بيسأل على الناس ضحكته صافيه ترتاحله كده

حسن ابراهيم

ده بقى كبير الليله تحب تسمعله وهو بيتكلم عملى جدا ما بيضيعش وقت

عاقل بيحب يحسب الامور حلو دايما تروحله لما يبقى فى مشكله كبيره ومكلكعه

ناجح وبيوصل للى عايزه

عبد الرحمن

ده بقى انتيمى اللى فى تجاره

واد لذيذ بيفهمنى وافهمه هو عندى فى البيت زيه زىى وكذلك انا عنده فى بيتهم كده

مدمن اى حاجه جديده بيعشق التغيير بيجرب الجديد مش مهم النتايج او الحسابات هو بيحب يجرب

جنبك وقت ما تحتاجه

رامى

ده بقى اطول صاحب اعرفه فى حياتى كلها وانتيمى برضه اعرفه من تالته ابتدائى وصاحبته فى خامسه احسبوا انتوا بقى وهو دلوقتى فى حاسبات السلاب

وقت الزنقه جانيك ما بينساش اصحابه ابدا تحس فيه بالبراءه كده لما يضحك تعرف تأثر عليه طيب اوى

بيعرف يعمل صحبيات جديده بيموت فى الخروج ما بيحبش قعده البيت

دول كانوا اصحابى فى حاجات فيهم كلهم

انهم رجاله و جدعان بيحبوا بعض وبيحبوا الناس مايتشبعش من قعدتنا ولا لمتنا مع بعض دمهم خفيفن طيبين ورتحالهم من اول ما تعرفهم ولو لاحظتوا تقريبا اللى قلته فى كل واحد قلته فى اللى بعد زايد حاجه او ناقص حاجه

زى ما بيقولوا الطيور على اشكالها تقع:))

دول كانوا اصحابى انا ما وصفتش كل حاجه فيهم طبعا عشان الكتابه الكتير

وزى ما انتوا شايفين عشان كده هما اصحاب فوق العاده وكلنا بنحب بعض

ولو حد شافنى قصرت فى حقه يسامحنى ولو قولت حاجه مش فيه يسامحنى وانا ما عدتش نفسى فيهم سايبهم هما اللى يقولوا

سلام